Infurmaziuns per geniturs

Giuvenils siemian da daventar ritgs immediatamain u da gudagnar daners a moda fitg simpla. Questas speranzas falsifitgeschan lur vista sin las schanzas da gudagnar realas.
Perquai èsi impurtant da discutar cun els davart ils fatgs:

• La casualitad gudogna adina – gieus per daners èn totalmain incalculabels. Quai vala er per poker e scumessas da sport. Sin l'entir mund pon mo paucas giugadras e paucs giugaders da poker gudagnar lur custs da viver tras il giugar.
• I vegn adina pers dapli che gudagnà – l'industria da gieus per daners sa finanziescha uschia.
• Da cuntanscher in da sis en il lotto è main probabel che vegnir tutgà d'in chametg.

Da porscher gieus a giuvenils sut 18 onns è scumandà. Quest scumond ha l'intent da proteger ils giuvenils e betg d'als chastiar. Giuvenils pon dentant chattar facilmain access a questas purschidas tras indicaziuns faussas da la vegliadetgna e cun ina carta da credit, tge che blers giuvenils che giogan fan er.
La participaziun a gieus per daners illegals en l'internet n'è betg chastiabla, els sa movan dentant betg en in rom giuridic liant, ins na po p.ex. betg reclamar in gudogn.

Discurrer ensemen protegia: Discurra cun tes uffant u giuvenil davart ses interess, t'interessescha per ses mund – n'emporta betg sche quai èn gieus da computer, gieus per daners u interess per il sport – quai pussibilitescha ina communicaziun autentica. Adatta il discurs a la vegliadetgna da l'uffant/dal giuvenil.

Tips: Prender temp per il discurs: «Da tge siemias ti?»/«Tge faschessas ti, sche ti gudagnassas bler?»/«Tge t'interessescha spezialmain vi da quest gieu?»/«Pertge ta fascinescha quai?» Empruvar ensemen in gieu.

La famiglia è impurtanta per ils giuvenils – er sche quai na para mintgatant betg uschia. La cuminanza protegia ils giuvenils da sviluppar in cumportament da gieu u da consum problematic.

Cumportament da ristga durant giugar

• Circa mintga quart giuvenil ha giugà ils ultims 12 mais in gieu per daners. 5 % dals giuvenils che giogan (15 fin 19 onns) en Svizra han in cumportament en il gieu problematic, tar ils creschids èn quai tranter 1–2 %.
• Giuvenils fan ultra da quai pli svelt debits en connex cun in gieu per daners, perquai ch'els disponan da main daners.

Facturs da ristga

• Mats giogan pli savens ed els han plitost problems che mattas.
• Pli giuven ch'i vegn cumenzà a giugar e pli savens ch'i daventa problematic.
• Sche bler daner da giaglioffa stat a disposiziun senza reglas pertutgant il diever, vegn plitost giugà.
• Relaziuns da famiglia caoticas, negligientscha dal giuvenil ed integraziun manglusa dals geniturs.